Joh 15 | NdeIBE | STEP | “Mina ngilivini eliqotho, uBaba ungumlimi.

John 15

Ivini Lamagatsha

1 “Mina ngilivini eliqotho, uBaba ungumlimi.

2 Wonke amagatsha angatheli izithelo uyawaquma, kuthi wonke amagatsha athelayo uwathena kuhle ukuze athele okwandileyo. 3 Lina selihlambulukile ngenxa yelizwi esengilikhulumile kini. 4 Hlalani kimi, lami ngizahlala kini. Kalukho ugatsha olungathela izithelo ngokwalo; lumele luhlale lusevinini. Lani lingeke lithele izithelo ngaphandle kokuthi lihlale kimi.

5 Mina ngilivini; lina lingamagatsha. Aluba umuntu ehlala kimi lami kuye, uzathela izithelo ezinengi; ngaphandle kwami kakukho elingakwenza. 6 Nxa loba ngubani engahlali kimi, unjengogatsha olulahliweyo lwabuna; amagatsha anjalo ayathezwa abaswe atshe. 7 Uma lihlala kimi lamazwi ami ehlala kini, celani loba yini eliyifunayo, lizayiphiwa. 8 Lokhu kungokwenkazimulo kaBaba ukuze lithele izithelo ezinengi, lizitshengisa ukuthi lingabafundi bami.

9 “Njengoba uBaba engithandile, kanjalo lami ngilithandile. Manje-ke hlalani othandweni lwami.

10 Aluba lilalela imilayo yami, lizahlala lisothandweni lwami, njengoba lami ngilalele imilayo kaBaba ngihlala ngisothandweni lwakhe.

11 Ngilitshelile lokhu ukuze ukuthokoza kwami kube kini njalo ukuze ukuthokoza kwenu kuphelele. 12 Umlayo wami yilo: Thandanani njengoba ngilithandile lina. 13 Kakho olothando olukhulu kulaye onikela ukuphila kwakhe kubangane bakhe. 14 Lingabangane bami uma lisenza lokho engiliyala khona. 15 Kangisalibizi ngokuthi liyizinceku ngokuba inceku kayiwazisisi umsebenzi wenkosi yayo. Kodwa ngithe kini lingabangane ngoba konke engakufunda kuBaba ngilazisile. 16 Kalingikhethanga, kodwa ngalikhetha mina ukuthi lihambe liyothela izithelo – izithelo ezizahlala njalo. Lapho-ke uBaba uzalinika loba yini eliyicelayo ngebizo lami.

17 Nanku umlayo wami: Thandanani.

Umhlaba Uzonda Abafundi

18 “Nxa umhlaba ulizonda, khumbulani ukuthi wangizonda mina kuqala. 19 Ngabe belingabawo umhlaba ubuzalithanda njengabawo. Ikanti kalisibo abomhlaba, kodwa ngilikhethe lisemhlabeni. Yikho umhlaba ulizonda.

20 Khumbulani amazwi engawakhuluma kini ngathi: ‘Kakulanceku enkulu kulenkosi yayo.’ Nxa bangichukuluza mina, lani bazalichukuluza. Aluba balalela imfundiso yami, bazayilalela leyenu.

21 Bazaliphatha ngaleyondlela ngenxa yebizo lami, ngokuba kabamazi lowo ongithumileyo. 22 Aluba bengingezanga ngakhuluma kubo bebengayikuba lomlandu wesono. Kodwa manje kabaselaxolo ngesono sabo. 23 Lowo ozonda mina uzonda kanye loBaba. 24 Uma ngangingenzanga phakathi kwabo lokho okwakungenziwanga ngomunye umuntu babengayikuba lomlandu wesono. Kodwa khathesi sebeyibonile imimangaliso le, kodwa bajinge bangizonde mina kanye loBaba.

25 Kodwa lokho yikuze kugcwalise okulotshiweyo eMthethweni wabo ukuthi: ‘Bangizonda kungelasizatho.’ 26 Angaze afike uMeluleki engizamthumela kini evela kuBaba, uMoya weqiniso ophuma kuBaba, uzafakaza ngami;

27 kodwa lani kalibofakaza, ngokuba selokhu laba lami kusukela ekuqaleni.